डोटीका जेठारा ठगी धन्दामा, काठमाडौंमा पक्राउ

बैतडी : पोर्चुगल पठाउने भन्दै ठगी गर्ने डोटीका एक युवक पक्राउ परेका छन्। डोटीको बडीकेदार गाउँपालिका–३ घर भई काठमाडौँ महानगरपालिका–१४ बस्ने २९ वर्षीय पूर्णबहादुर जेठारा पक्राउ परेका हुन्। 

नेपाल प्रहरीको काठमाडौँ उपत्यका अपराध अनुसन्धान कार्यालयका अनुसार आकर्षक तलबको प्रलोभनमा पारेर वैदेशिक रोजगारीमा पोर्चुगल पठाइदिने भन्दै तीन जनाबाट नौ लाख रुपैयाँ लिएर जेठारा सम्पर्कविहीन भएका थिए। उनलाई काठमाडौँमै पक्राउ गरी वैदेशिक रोजगार विभाग ताहाचल पठाइएको कार्यालयका प्रहरी उपरीक्षक सूचना अधिकारी काजीकुमार आचार्यले बताए।

जेठारासँगै जापान पठाइदिने भन्दै ठगी गर्ने नुवाकोटको बेलकोटगढी नगरपालिका–१२ घर भई काठमाडौँको नागार्जुन नगरपालिका–२ बस्ने ३७ वर्षीय राजकुमार लामा पनि पक्राउ परेका छन्। जापान पठाइदिने भन्दै एक जनाबाट पाँच लाख ५० हजार रुपैयाँ लिएर सम्पर्कविहीन भएका राजकुमारलाई पनि  वैदेशिक रोजगार विभाग ताहाचल पठाइएको छ।